මොකද්ද මේ VPN කියන්නෙ

 සරළව කියනවා නම් VPN කියන්නේ ආරක්ෂිතව අන්තර්ජාලයට සම්බන්ධ වෙන්න පුලුවන් ක්‍රමවේදයකට.

 ඒ වගෙම පුද්ගලික හෝ පොදු ඕනේම අන්තර්ජාල සම්බන්ධතාවයක ආරක්ෂාව තවත් වැඩි කර ගන්න මේ VPN තාක්ෂණය භාවිතා කරන්න පුලුවන්. තමන්ගේ දත්ත සහ තොරතුරු අන්තර්ජාලය තුලදී වඩාත් ආරක්ෂිතව හුවමාරු කර ගන්න අවශ්‍ය පහසුකමත් VPN හරහා ලබා දෙනවා. VPN එකක ප්‍රධානම භාවිතය වෙන්නේ කෙනෙක් ජාලයක් භාවිතා කරද්දි තුන්වෙනි පාර්ෂවය ඒකට බලපෑම් කරන එක නවත්වන එකයි.

VPN හරහා ලබා දෙන වෙනත් සේවාවනුත් තියෙනවා. ඒ තමයි ඔබේ අන්තර්ජාල නිර්නාමිකත්වය (anonymity) ආරක්ෂා කර දීම, (Geo-spoof) තමන් සිටින ස්තානය සගවලා වෙනත් ස්තානයකින් අන්තර්ජාලයට සම්බන්ධ වෙන බව පෙන්වීම, අවහිර කරන ලද වෙබ් අඩවි වලට පිවිසීමට අවස්තාව ලබා දීම වගේ දේවල්.

අන්තර්ජාලය භවිතා කරන කොට අපේ පෞද්ගලික තොරතුරු තුන්වෙනි පාර්ශවයක් අතට යන්නේ කොහොමද කියලා ඇත්තටම ඔබ දැන් කල්පනා කරනවා ඇති. ඒක වෙන්නේ මෙහෙමයි..

අපි යම් තොරතුරක් දැන ගන්න හරි වෙනත් අවශ්‍යතාවයකට හරි Website එකකට log වෙන්න domain එක type කරනකොට ඒ request එක අන්තර්ජාලයේ තියෙන අනෙක් විශේෂිත server computers වලට යනවා. ඒවට කියන්නේ DNS නැත්නම් Domain Name Servers කියලයි. ඉන් පසුව ඔවුන් ලග තිබෙන ලිස්ට් එකෙන් අපි එවපු නමට අදාල website එකේ IP adress එක ඔවුන් නැවත අපි වෙත එවනවා..

එවිට අපේ web browser එකෙන් ඒ IP adress එක අරන් අපිව ඒ අදාල Website එකට එක්කන් යනවා. මේ හැමදේම වෙන්න තත්පර ගානක් විතරක් යන නිසා මෙතන පියවර 2ක් තියෙනවා කියලා අපිට තේරෙන්නේ නැහැ.

ඉතින් මේ ක්‍රියාවලියේ තියෙන ගැටළුව තමයි අපි Translate කරලා එවන්න, domain name request එක යවන අතරතුරේදීම location එක, Operating System එක, Device එකේ වර්ගය වගේ අපේ දත්ත බොහෝ ප්‍රමානයක් අපෙන් ඔවුන් වෙත යනවා. Website එක අපේ device එකට දන්න භාෂාවකින් load වෙන්නේ මෙන්න මේ විස්තර වලට අනුවයි. ඉතින් මෙවැනි අවස්තාවක තුන්වෙනි පාර්ශවයකට (රටක රජයකට වගේ) පුලුවන් අන්තර්ජාල සේවා සපයන්නන්ගේ (Internet Service Providers) උදව් ඇතුව මේ යවන දේවල් දිහා බලන් ඉඳල තෝරගත්ත පිරිසකට තෝරගත්ත Website එකකට යන එක තහනම් කරන්න. උදාහරණයක් විදියට පහුගිය කාලේ අපේ රටේ රජය විසින් facebook තහනම සිදු කලේ මේ විදියටයි. ඒ වගෙම තවත් පිරිසකට පුලුවන් මේ දේවල් පාවිච්චි කරලා ඔයාව හරියටම ඉලක්ක කරලා advertising වගේ දේවල් කරන්න.

ඉතින් VPN software එක අතරමැදියෙක් විදියට උදවුවට එන්නේ මෙන්න මේ වෙලාවටයි. අපි VPN software එකක් මගින් අන්තර්ජාලයට සම්බන්ධ වෙන විට අපේ හැම දෙයක්ම පාලනය කරන්නේ ඔවුනුයි. එහිදී ඔවුන් මුලින්ම VPN වලින් යවන දත්ත encrypt කරනවා. ඒ කියන්නේ තුන්වෙනි පාර්ශවයක් අතට ඒ දේවල් ගියොත් ඒ අයට බලන්න බැරි වෙන්න මාරු කරනවා.

VPN සේවා සපයන ආයතන වලට එක් එක් රටවල ඔවුන්ගේම servers තිබෙනවා. එහිදී අපි VPN software එකක් දාගත්තට පස්සේ අපි විසින් website වලට යවන්න කරන request කෙලින්ම යන්නේ ඔවුන්ගේ server එකටයි. එතනින් අපේ geographical location එක මාරු වෙනව ශ්‍රී ලංකාවෙ ඉදන් ඒ server එක අයිති රටේ VPN server එකේ adress එක විදියට. එවිට එම රටේ server එක අපිට යන්න අවශ්‍ය website එකට අපේ request එක යවනවා. එවිට අපි අතරමැදියෙක් හරහා එන නිසා අපට යන්න ඕන website එකේ server එකෙන් හිතන්නෙ අපි ඉන්නේ එම අදාල රටේ කියලයි. මෙහිදී ඉහතනින් සදහන් කල කිසිදු තහනමකින් තොරව VPN එක මගින් නිර්මාණය කර දුන් මේ අලුත්ම රහස් මාර්ගය දිගේ අපට ඕන website එක අපට ලැබෙනවා. මේ ක්‍රියාමාර්ගය කිසිදු තැනකදි නීති විරෝධී වෙන්නේ නැහැ වගෙම අපේ පෞද්ගලිකත්වයත් ආරක්ෂා වෙනවා.

ඒ වගෙම VPN භාවිතා කිරීමේ තවත් වාසි තියෙනවා. අපි පිටරටකට යනකොට ගුවන් ටිකට් පත් සහ හෝටල් වෙන් කිරීමේදී එක එක රටවල් වලට එකම journey එකට හෝටල් පෙන්නන්නෙ එක එක ගණන් වලටයි. මේ වගේ අවස්තා වල දී අපිට පුලුවන් එක එක location වලට මාරු වෙලා ටිකට් වලට සහ හෝටල් වලට යන ගණන් සංසන්දනය කරලා අඩුම එක ගන්න.

ඉතින් මේ හැම පහසුකමක්ම තිබුනත් VPN සේවාවක් තෝරා ගැනීමේදී සැලකිලිමත් විය යුතුයි. මොකද අන්තර්ජාලය තුල තිබෙන සෑම VPN සේවාවක්ම ආරක්ෂිත වෙන්නේ නැහැ.

Commonwealth Scientific and Industrial Research Organization මඟින් 2015 දී ප්‍රකාශයට පත්කරපු වාර්තාවකට අනුව Google Play Store එකේ ඇති Free VPN 283ක් පිළිබඳව සිදුකළ පරික්ෂාවේ දී එම VPN වලින් 84%ක් පරිශීලක IP ලිපිනයන් ආරක්ෂා නොකරන බවද, එමෙන්ම 66%ක් VPN වලින් පරිශීලකයන්ගේ අන්තර්ජාල පිවිසුම් තොරතුරු ආරක්ෂා නොකරන බවද, 16%ක් VPN මඟින් පරිශීලකයන්ගේ Bandwidth සොරාගැනීම සිදු කරන බවත් හෙලිව තිබෙනවා. ඒ වගේ තවත් VPN සේවාවන් මගින් තමන්ගේ පරිශීලකයන්ගේ දත්ත වෙනත් පාර්ශව වලට විකිණීමද සිදු කරනව

ඒ නිසා PPTP තාක්ෂණය යටතේ ක්‍රියාත්මක නොවන, තමන්ගේ පරිශීලකයන්ගේ Traffic logs තබාගන්නේ නැති, තමන්ගේ පරිශීලකයන්ගේ තොරතුරු මොනම හේතුවක් නිසාවත් වෙනත් පාර්ශවයකට විකුණන්නේ නැති VPN එකක් තෝරා ගන්න සැලකිලිමත් වෙන එක හොදයි